تفتكر حد ممكن يكسب ١٢ مليون دولار في سنة واحدة من ورا برنامج الاكسل ؟؟
اه ممكن
فيه واحدة اسمها kat Norton او miss excel زي مابيلقبوها
موظفة مغمورة في شركة وظيفتها data entry حبيت تتسلي في يوم فبدأت تنزل فيديوهات علي تيكتوك من غير ماتتكلم خالص بتشرح فيها تريكات الاكسل اللي بتقابلها في شغلها اليومي
الفيديوهات عبارة عن مزيكا بس وشرح كتابة لمعادلة من معادلات الاكسل في حوالي ١٥ ثانية حاجة كدا
المهم ان الاخت ديه فيديوهاتها انتشرت بكثافة علي التيكتوك وبقي ليها متابعين كتير فقررت تحول نجاحها وشهرتها ده لبيزنس
عملت ايه الأروبة ؟؟ لا ابدا راحت عملت كورسات اونلاين بتشرح فيها الاكسل والاوفيس وكدا
بس كدا ؟؟
اه بس كدا
وياتري كسبت ؟؟
علي حسب كلامها فهي حققت مبيعات في اول سنة بحوالي ١٢ مليون دولار ولما دخلت الموقع بتاعها لاقيت كورساتها غالية في رينج من ٣٠٠ ل ٧٠٠ دولار الكورس الواحد فطبيعي اعمل الارقام ديه عادي
من الاكسل ؟ هو فيه حد محتاج ياخد كورسات في الاكسل ده سهل ياعم ؟ هو فيه حد عايز يدفع فلوس علشان يتعلم اكسل ؟ ده كله موجود علي اليوتيوب ياعم
اه فيه حد محتاج يتعلم اكسل لسبب ما في حياته
في حد مستعد يدفعلك انت شخصيا فلوس علشان تعلمه ازاي يعمل اللي بتعمله من سنين بشكل روتيني وعادي جدا في حياتك 
عايز يتعلمه منك انت مش من اليوتيوب
وده اللي بيسموه الinformation business
ازاي تحول المعرفة بتاعتك لبيزنس قائم يدخلك ارباح مادية باستمرار
مهما كانت نوع المعرفة ديه ايه ومهما كانت اهميتها فيه شخص ما موجود علي الكوكب مستعد يدفع فلوس علشان تعلمهاله
